ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ ⴰⵙⵙ ⵏ ⵓⴽⵡⴰⵙ 14 ⴷⵓⵊⴰⵏⴱⵉⵔ 2023 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵜⴳⴷⵓⴷⴰⵏⵜ ⵏ ⵡⴰⴷⵔⵉⴱⵉⴷⵊⴰⵏ ⵎⴰⵙⵙⴰ ⵚⴰⵃⵉⴱⴰ ⴳⴰⴼⴰⵕⵓⴼⴰ ⵏⵏⴰ ⵉⵙⴽⴰⵔⵏ ⵢⴰⵏ ⵓⵔⵣⴰⴼ ⵏ ⵜⵡⵓⵔⵉ ⵉ ⵜⴳⵍⴷⵉⵜ ⵏⵏⵉⴳ ⵏ ⵢⴰⵏ ⵓⴽⴰⴱⴰⵕ ⴰⵏⴼⵔⴰⵔ.
ⴳ ⵜⵉⵣⵡⵉⵔⵉ ⵏ ⵓⵏⵎⵓⵇⵇⴰⵔ ⴰⴷ, ⵉⵙⵙⵉⵡⵍ ⵎⴰⵙⵙ ⴰⵏⵙⵙⵉⵅⴼ ⵅⴼ ⵓⴱⵓⵔⵣ ⵏⵏⵙ ⵙ ⵓⵔⵣⴰⴼ ⴰⴷ ⵏⵏⴰ ⵉⵙⵏⵄⴰⵜⵏ ⵜⵉⵕⵡⵉ ⵏ ⵜⵙⵇⵇⴰⵏ ⵜⵉⵙⵉⵏⵔⴰⵏⵉⵏ ⴷ ⵜⵖⴱⵉ ⵏ ⵉⵙⵖⵡⴰⵏ ⵏ ⵜⴳⵯⵎⴰⵜ ⴷ ⵜⴷⵍⵙⴰ ⴷ ⵜⵖⵔⵎⴰ ⵏⵏⴰ ⵉⵙⵎⵓⵏⴰⵏ ⵍⵎⵖⵔⵉⴱ ⴷ ⵡⴰⴷⵔⵉⴱⵉⴷⵊⴰⵏ, ⵎⴽⴷⴰ ⵉⵏⵏⴰ ⵎⴰⵙ ⵓⵙⵏ ⴷ ⴳ ⵢⴰⵏ ⵓⵎⵏⴰⴹ ⵉⵀⵢⵢⴰⵏ ⵏⵏⴰ ⴳⵉⵙ ⵙⴼⵓⴳⵍⵓⵏ ⵙⵉⵏ ⵉⵡⴰⵏⴽⵏ ⵙ ⵜⵉⴽⴽⵉⵜ ⵏ ⵡⴰⴳⵏⴰⵔ ⴷ ⵎⵔⴰⵡ ⵏ ⵉⵙⴳⴳⵯⴰⵙⵏ ⵅⴼ ⵓⵙⵔⵓⵙ ⵏ ⴽⵔⴰ ⵏ ⵜⵙⵇⵇⴰⵏ ⵜⵉⴷⵉⴱⵍⵓⵎⴰⵙⵉⵢⵉⵏ ⵉⵙⴽⵔⵏ ⵢⴰⵜ ⵜⴷⵔⴰⵡⵜ ⵉⵕⵡⴰⵏ ⵉⵖⵓⴷⴰⵏ.
ⴰⵀⴰ ⵉⵙⵙⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⴳ ⵓⵙⴰⵜⵉ ⴰⴷ ⵙ ⵓⵙⵏⵎⴰⵍⴰ ⵏ ⵜⵙⵓⵜⵍⵜ ⵜⵉⵙ ⵙⵏⴰⵜ ⵏ ⵜⵙⵇⵇⵉⵎⵜ ⵉⵙⵙⵓⵔⵏ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ, ⵏⵏⴰ ⴷⵉⴳⵙ ⴰⵙⴳⵎⴹ ⵏ ⴽⵔⴰ ⵏ ⵜⵎⵢⴰⵇⵇⴰⵏⵉⵏ ⴷ ⵜⵎⵙⵙⴽⵜⴰⵢ ⵏ ⵓⵏⵔⴰⵎⴰⵙ ⴳ ⵜⵓⴳⵜⵜ ⵏ ⵉⴳⵔⴰⵏ, ⴰⵢⴰⴷ ⴰⵔ ⵉⵎⵎⴰⵍ ⵜⴰⵎⵔⵉⵙⵜ ⵏ ⵜⵎⵉⵣⴰⵔ ⵙ ⵙⵏⴰⵜ ⵙ ⵓⵙⵎⵢⴰⵏⴰⵡ ⴷ ⵓⵙⵖⴱⵉ ⵏ ⵓⵎⵢⴰⵡⴰⵙ ⵏⵏⵙⵏⵜ, ⴷ ⵓⵢⵏⵏⴰ ⵙ ⵜⵖⴰⵔⴰⵙⵜ ⵏ ⵉⵙⵡⴰⵍⴰⵜⵏ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴷ ⴱⴰⴱ ⵏ ⵜⵎⵎⵓⵖⵔⴰ ⵉⵍⵀⴰⵎ ⵄⴰⵍⵢⵉⴼ.
ⵍⵍⵉⴳ ⵉⵙⵙⵎⵏⵉⴷ ⴽⵔⴰ ⵏ ⵉⵙⴼⵔⵓⵜⵏ ⵉⵙⵎⴷⵏ ⵅⴼ ⵜⵡⵓⵔⵉ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴷ ⵜⵏⴼⴰⵍⵉⵜ ⵏⵏⵙ ⴷ ⵜⵥⵍⴰⵢⵉⵏ ⵏⵏⵙ, ⵉⵙⵙⵉⵡⵍ ⵎⴰⵙⵙ ⴰⵏⵙⵙⵉⵅⴼ ⵎⴰⵙ ⵢⵓⵊⴰ ⵓⵙⵇⵇⵉⵎ ⴰⴷ ⵉⵎⵓⵏ ⴷ ⵉⵎⵙⴷⴷⵉ ⵏ ⵓⵙⴱⵓⵖⵍⵓ ⵏ ⵜⵙⵇⵇⴰⵏ ⴰⴷ ⵜⵉⵙⵉⵏⵔⴰⵏⵉⵏ ⴷ ⵓⵙⴷⵓⵙ ⵏⵏⵙⵏⵜ ⵙ ⵇⴰⵃ ⵜⵉⵙⵏⵜⴰⵢⵉⵏ.
ⵎⴽⴷⴰ ⵓⵔ ⵉⵣⵔⵉ ⵓⵣⵎⵣⵣⵓ ⵉ ⵎⴰⵙⵙ ⴰⵏⵙⵙⵉⵅⴼ ⴰⴷ ⵉⵙⵏⵉⵎⵎⵔ ⴰⴷⴷⴰⴷ ⵉⵕⵚⴰⵏ ⵏ ⵜⴳⴷⵓⴷⴰⵏⵜ ⵏ ⵡⴰⴷⵔⵉⴱⵉⴷⵊⴰⵏ ⵉⵙⵙⴷⵡⴰⵙⵏ ⵜⴰⵎⵓⵏⵜ ⵜⴰⵎⵓⵔⴰⵏⵜ ⵏ ⵍⵎⵖⵔⵉⴱ ⴷ ⵓⴱⴰⴹ ⵏⵏⵙ ⵅⴼ ⵜⵏⵣⵔⵓⴼⵜ ⵏⵏⵙ، ⴰⵀⴰ ⵉⵙⴷⴷⵉⴷ ⴷⴰⵖ ⵜⴰⵙⵓⵍⵜ ⵡⴰⵏⵏⴰⵍ ⴰⵎⵖⵔⴰⴱⵉ ⵉ ⵡⴰⴷⵔⵉⴱⵉⴷⵊⴰⵏ ⴳ ⵜⵓⴳⵜⵜ ⵏ ⵜⴼⵓⴳⵍⵉⵡⵉⵏ ⵜⵉⴳⵔⴰⵖⵍⴰⵏⵉⵏ ⵃⵎⴰ ⴰⴷ ⵢⵉⵍⵉ ⵓⵃⵟⵟⵓ ⵏ ⵜⵎⵓⵏⵜ ⵏⵏⵙ ⵜⴰⵎⵓⵔⴰⵏⵜ ⴷ ⵜⵏⴼⵔⵓⵜ ⵏ ⵜⵎⵓⵔⴰ ⵏⵏⵙ.
ⵙⴳ ⵜⵏⵉⵍⴰ ⵏⵏⵙ ⵜⵙⵏⵉⵎⵎⵔ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵜⴳⴷⵓⴷⴰⵏⵜ ⵏ ⵡⴰⴷⵔⵉⴱⵉⴷⵊⴰⵏ ⵅⴼ ⵓⵙⵎⵖⵔ ⵏ ⵓⵙⵏⵓⴱⴳ ⵏⵏⴰ ⵉⵚⴰⵃⴰⵏ ⵉ ⵓⴽⴰⴱⴰⵕ ⴳ ⵓⵔⵣⴰⴼ ⴰⴷ ⵏⵏⵙ, ⴰⵀⴰ ⵜⵓⵍⵖ ⴷⴰⵖ ⴰⴱⵓⵖⵍⵓ ⵏⵏⴰ ⵉⵍⵍⴰⵏ ⴳ ⵜⴳⵍⴷⵉⵜ ⴳ ⵜⵓⴳⵜⵜ ⵏ ⵉⴳⵔⴰⵏ. ⵎⴽⴷⴰ ⵜⵙⵙⵉⵡⵍ ⵎⴰⵙⵙⴰ ⵚⴰⵃⵉⴱⴰ ⴳⴰⴼⴰⵕⵓⴼⴰ ⵅⴼ ⵡⴰⴳⴳⴰⴹ ⵏ ⵜⵙⵇⵇⴰⵏ ⵜⵉⵙⵔⵜⴰⵏⵉⵏ ⵏⴳⵔ ⵉⵡⴰⵏⴽⵏ ⵙ ⵙⵉⵏ, ⵎⴰⵛⴰ ⵜⵙⴷⴷⵉⴷ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵙⵅⵉⵜⵔ ⵏ ⵜⵓⴳⴳⴰⵙ ⵉ ⵓⴹⴰⴽⴰⵍ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴷⵎⵙⴰⵏ ⴷ ⵓⵙⵙⴰⵔⵓ ⵏ ⵇⴰⵃ ⵉⵣⵎⵎⵣⴰ ⴷ ⵜⵙⵓⴳⴰⵔ ⵉⵍⵍⴰⵏ.
ⴷⴰⵢ ⵜⵔⵏⵓ ⵎⴰⵙⵙⴰ ⵜⴰⵏⵙⵙⵉⵅⴼⵜ, ⵎⴰⵙ ⵉⵜⵜⵓⵙⵓⵜⵔ ⵙⴳ ⵉⵡⴰⵏⴽⵏ ⵙ ⵙⵉⵏ ⴰⴷ ⴼⴽⵉⵏ ⵢⴰⵜ ⵜⴷⵉⵏⴰⵎⵉⵜ ⵜⴰⵎⴰⵢⵏⵓⵜ ⵉ ⵓⵎⵢⴰⵡⴰⵙ ⵏⵏⵙⵏ ⴳ ⵢⵉⴳⵔ ⴰⴱⵕⵍⴰⵎⴰⵏⵉ ⵙ ⵜⵖⴰⵔⴰⵙⵜ ⵏ ⵓⵙⴷⵓⵙ ⵏ ⵡⴰⵎⵎⴰⴽⵏ ⵏ ⵓⵎⵙⴰⵡⴰⵍ ⴷ ⵓⵎⵛⴰⵡⴰⵕ, ⵃⵎⴰ ⴰⴷ ⵢⵉⵍⵉ ⴳ ⵜⵏⴰⴼⵓⵜ ⵏ ⵜⵎⵙⴰⵔⵉⵏ ⵉⵍⴰⵏ ⴰⴽⴰⵎⴷ ⵉⵛⵛⴰⵔⵏ.
ⴳ ⵎⴰⴷ ⵉⵣⴷⵉⵏ ⴷ ⵜⵎⵙⴰⵔⵜ ⵏ ⵜⵎⵓⵏⵜ ⵜⴰⵎⵓⵔⴰⵏⵜ ⵏ ⵜⴳⵍⴷⵉⵜ, ⵜⵙⵎⴰⵢⵏⵓ ⵎⴰⵙⵙⴰ ⵜⴰⵏⵙⵙⵉⵅⴼⵜ ⴰⵙⴷⵓⵙ ⴰⵎⵖⵍⴰⵍ ⴷ ⵓⵔⵎⵙⴽⵉⵍ ⵏ ⵜⵎⴰⵣⵉⵔⵜ ⵏⵏⵙ ⵉ ⵓⴱⴰⴹ ⵏ ⵍⵎⵖⵔⵉⴱ ⵅⴼ ⵜⵙⴳⵉⵡⵉⵏ ⵏⵏⵙ ⵏ ⵢⵉⴼⴼⵓⵙ, ⴰⵀⴰ ⵜⵙⵙⵓⵜⴳ ⴰⵎⵙⴰⵙⴰ ⵏ ⵜⴰⵏⵏⴰⵢⵉⵏ ⵏ ⵜⵎⵉⵣⴰⵔ ⵙ ⵙⵏⴰⵜ ⴳ ⵎⴰⴷ ⵉⵥⵍⵉⵏ ⵙ ⵜⵓⴳⵜⵜ ⵏ ⵜⵎⵙⴰⵔⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ ⴷ ⵜⵓⵙⵏⵜ ⵙ ⵓⴱⴰⴹ ⵏ ⵉⵡⴰⵏⴽⵏ ⴷ ⵜⵎⵓⵏⵜ ⵏⵏⵙⵏ ⵜⴰⵎⵓⵔⴰⵏⵜ ⴷ ⵓⴼⵙⴰⵢ ⵏ ⵉⵎⵏⵣⴰⵖⵏ ⵙ ⵜⵖⴰⵔⴰⵙⵉⵏ ⵜⵉⵏⴳⵔⴰⵢⵉⵏ.
ⵉⴳⴰ ⵓⵏⵎⵓⵇⵇⴰⵔ ⴰⴷ ⴰⵡⴷ ⵢⴰⵏ ⵓⵣⵎⵣⵣⵓ ⵏ ⵓⵙⵎⴰⵍ ⵏ ⵓⴷⵖⴰⵔ ⵏ ⵜⵎⵔⵙⵍⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵎⵓⵖⵍⵉ ⴰⵎⵔⵙⴰⵍ ⴳ ⵜⵎⵉⵣⴰⵔ ⵙ ⵙⵏⴰⵜ ⴷ ⵜⵉⵍⴰⵍ ⵜⵉⵏⴼⵔⴰⵔⵉⵏ ⵏⵏⴰ ⵜⵥⴹⴰⵕ ⴰⴷ ⵜⵏⵜ ⵜⵙⴽⵔ ⴳ ⵜⴳⴳⴰⵥⵜ ⵏ ⵜⵙⵇⵇⴰⵏ ⵜⵉⵙⵉⵏⵔⴰⵏⵉⵏ ⴷ ⵓⵙⴱⵓⵖⵍⵓ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴷ ⵓⵙⴷⵓⵙ ⵏ ⵜⵙⵇⵇⴰⵏ ⴰⴽⴷ ⵉⴱⵕⵍⴰⵎⴰⵏⵏ ⵉⵙⴳⴰⵡⴰⵏⵏ ⴷ ⵉⵎⵏⵥⴰⵡⵏ.